Բազմաբնակարան շենքերում ավելի քան 40 տարի շահագործվող վերելակները փոխարինվում են: Երևանի քաղաքապետարանն այս տարվա ծրագրում նախնական ներառել էր 426 վերելակ: Սակայն ծրագրի ծավալը տասը տոկոսով ավելացվել է, փոխվող վերելակների թիվը հասցնելով 467-ի: 300-ն արդեն տեղադրվել է, անցել ԱԻՆ փորձաքննություն և շահագործվում է: Մյուս մասը տեղադրման և կարգավորման փուլում է: Նոր վերելակները հարմարեցված են նաև սահմանափակ կարողություններով անձանց համար. դռների լայնությունը հնարավորություն է տալիս ազատորեն վերելակ մտնել սայլակներով: Բրայլյան այբուբենով թվատախտակն ու ձայնային ազդանշանն էլ տեսողության խնդրով քաղաքացիների համար է: Նոր վերելակները նաև մոտ 50 տոկոսով նվազեցնում են էլեկտրաէներգիայի ծախսը: 467 վերելակները փոխելուց հետո Երեւանում դեռևս փոխարինման ենթակա կլինի 3200 վերելակ: Քաղաքապետարանը նախատեսում է ծրագիրը շարունակել նաև հաջորդ տարի` ավելի մեծ ծավալով: 2023-ի համար նախատեսված է փոխել 700 վերելակ:
