Միասնական սոցիալական ծառայության տարածքային կենտրոնում հաշվառված եւ վերջին 3 ամսվա ընթացքում անընդմեջ գործազուրկի կարգավիճակ ունեցող՝ 35 տարեկանից բաձր տարիքի անձի աշխատանքի ընդունելու դեպքում գործատուն կստանա միանվագ 250 000 դրամ փոխհատուցում: Կառավարությունը հաստատել է Գործազուրկների զբաղվածության ապահովման ծրագիրը: Ըստ դրա՝ նպաստառու գործազուրկին աշխատանքի ընդունելու դեպքում փոխհատուցման գումարը կկազմի 350 000 դրամ: Փոխհատուցումը կտրամադրվի այն դեպքում, եթե գործատուն 1 տարի ժամկետով եւ լրիվ աշխատաժամանակի ռեժիմով աշխատանքային պայմանագիր կնքի գործազուրկի հետ: Առաջարկվում է ծրագրում ընդգրկել այն գործատուին, որը չի հանդիսանում հանրային ծառայություն իրականացնող պետական կառավարման համակարգի մարմին, մինչեւ այս ծրագրի համար դիմում ներկայացնելը գործել է առնվազն երկու տարի անընդմեջ, վերջին 3 ամսվա ընթացքում անընդհատ ունեցել է առնվազն 10 վարձու աշխատող, եւ նրա եկամտի փաստացի ֆոնդը նշված ժամանակահատվածում չի նվազել կամ նվազումը կազմել է ոչ ավելի, քան 5%: Գործատուն աջակցություն ստանալու նպատակով պետք է ներկայացնի առցանց դիմում եւ կստանա պետական աջակցություն միայն այն դեպքում, երբ կհաստատվի, որ աշխատանքի ընդունվող անձը համապատասխանում է ծրագրի չափանիշներին:
