Հոկտեմբերի 21-ի բիզնես լուրերը

Տեղական

Բեռնատարների վարորդների բարձրացրած հարցը ներառվել է ԵԱՏՀ խորհրդի օրակարգում
Վարորդների պահանջը՝ Ռուսաստանում գտնվելու ժամկետը 90-ից 180 օր դարձնելու վերաբերյալ, քննարկվում է ՀՀ կառավարության և ՌԴ գործընկերների միջև։ Հարցը ընդգրկվել է հոկտեմբերի 24-ին կայանալիք Եվրասիական տնտեսական հանձնաժողովի խորհրդի նիստի օրակարգում։

Հայաստանում մեկնարկել են խնամատար ծնող դառնալու դասընթացները
Դասընթացները կազմակերպվում են Աշխատանքի և սոցիալական հարցերի նախարարության, ՅՈւՆԻՍԵՖ-ի և Սոցիալական աշխատողների ասոցիացիայի կողմից՝ Գերմանիայի աջակցությամբ։ Դրանք անվճար են և կանցկացվեն հոկտեմբերից դեկտեմբեր։

ԵՄ-ն Սյունիքի զարգացման համար տրամադրում է շուրջ 200 միլիոն եվրո
«Դիմակայուն Սյունիք Թիմ Եվրոպա» նախաձեռնության նպատակն է խթանել մարզի տնտեսական զարգացումը։ Ծրագրի շնորհիվ ստեղծվել կամ պահպանվել է 95 աշխատատեղ, բացվել է 56 նոր ՓՄՁ և աջակցություն է ստացել ավելի քան 120 բիզնես։

ՀՀ բանկերում սպասարկվող հաճախորդների թիվը գերազանցել է 5.27 միլիոնը
2025թ․ հուլիսի դրությամբ բանկերում սպասարկվել է ավելի քան 5.2 մլն հաճախորդ՝ 8.3%-ով ավելի, քան անցյալ տարի։ Նրանցից շուրջ 5 մլն-ը ֆիզիկական անձինք են։

Հայտնաբերվել են վտանգավոր խաղալիքներ
«ՍԼԱՅՄԵՐ» տեսակի խաղալիքները չեն համապատասխանել անվտանգության չափանիշներին։ Վաճառքը կասեցվել է, խմբաքանակը հետ է կանչվել և ենթակա է ոչնչացման։ Քաղաքացիներին հորդորում են վերադարձնել գնված ապրանքը։

Միջազգային

ԱՄՆ-ի միջուկային անվտանգության վարչությունը 1400 աշխատակցի ուղարկել է արձակուրդ
Ֆինանսավորման պակասի պատճառով գործակալությունը դադարեցրել է աշխատավարձերի վճարումները։ Մոտ 400 աշխատակից շարունակում է աշխատել առանց վարձատրության՝ միջուկային համակարգերի անվտանգության նվազագույն մակարդակը պահպանելու համար։

Հնդկական Hindustan Silicon ընկերությունը 50 միլիոն դոլար կներդնի Վրաստանում նավթի արդյունահանման մեջ
Նախագիծը ներառում է յոթ արտադրական և երկու հետախուզական հորատանցք։ Վրաստանի կառավարությունը նշում է, որ ներդրումը կնպաստի էներգետիկ անվտանգության բարձրացմանը։

Չինաստանի արդյունաբերական արտադրությունը սեպտեմբերին աճել է 6.5%-ով
Միաժամանակ մանրածախ վաճառքները աճել են 3%-ով, իսկ կապիտալ ներդրումները նվազել են 0.5%-ով՝ 2024թ․ համեմատ։

Գերմանիայում գինու և խաղողի հյութի արտադրությունը կազմել է մոտ 820 միլիոն լիտր
Եղանակային բարենպաստ պայմանները նպաստել են խաղողի բարձր բերքին և արտադրության ծավալների աճին։