Հոկտեմբերի 13-ի բիզնես լուրերը

Տեղական

Գերմանիան Հայաստանին կտրամադրի 84.6 մլն եվրո դրամաշնորհ
Գերմանիան կհատկացնի 84.6 մլն եվրո՝ վերականգնվող էներգետիկայի, էներգաարդյունավետության, մասնագիտական կրթության, ջրային ենթակառուցվածքների և տեխնոլոգիական ոլորտում համագործակցության զարգացման նպատակով։

Հավաստագրված սերմերով աշնանացան իրականացնող հողօգտագործողները կստանան 80 հազար դրամ փոխհատուցում
Ծրագիրն ուղղված է բարձրորակ սերմերի օգտագործմանը և ցորենի արտադրողականության բարձրացմանը։ Դիմումները կընդունվեն մինչև նոյեմբերի 1-ը։

Շարունակվում է երեխաներ ունեցող ընտանիքների բնակարանային աջակցության ծրագիրը
Այս տարի արդեն աջակցություն է ստացել 2425 ընտանիք՝ ընդհանուր 2 մլրդ դրամի չափով։ Ծրագրի մեկնարկից ի վեր օգնություն է տրամադրվել ավելի քան 14,500 ընտանիքի։

ՀՀ-ԵՄ համատեղ կոմիտեն քննարկել է վիզաների դյուրացման և Շենգեն ընթացակարգերի բարելավման հարցեր
Քննարկվել են վիզաների տրամադրման ժամկետների երկարացման, փաստաթղթերի պահանջների միասնականացման և վճարների պարզեցման հարցերը։ Հայկական կողմը կարևորել է համաձայնագրով նախատեսված բոլոր պարտավորությունների հավասար կիրարկումը։

Միջազգային

ԱՄՆ-ը Չինաստանից ներմուծվող ապրանքների նկատմամբ կսահմանի 100% մաքսատուրք
Թրամփի որոշմամբ՝ նոյեմբերի 1-ից ուժի մեջ կմտնի նոր մաքսային ռեժիմը։ Քայլը կարող է հանգեցնել ԱՄՆ-Չինաստան առևտրային հարաբերությունների լուրջ լարվածության։

Իրան, Ռուսաստան և Ադրբեջան․ Բաքվում կկայանա բարձր մակարդակի հանդիպում «Հյուսիս–Հարավ» միջանցքի շուրջ
Եռակողմ բանակցությունների հիմնական նպատակը Ռեշտ–Աստարա երկաթուղու պայմանագրի ավարտումն է, ինչը հնարավորություն կտա անցնել գործնական իրագործման փուլին։

Եվրամիությունը գործարկել է մուտքի և ելքի թվային համակարգը
Նոր համակարգը նախատեսում է կենսաչափական տվյալների՝ դեմքի պատկերի և մատնահետքերի հավաքագրում։ Դա կպարզեցնի հետագա մուտքերի և ելքերի ընթացակարգը Շենգենյան տարածք։

ՌԴ-ն խստացրել է ՀՀ-ից բեռնափոխադրողների մուտքի կանոնները
Սեպտեմբերի 10-ից ուժի մեջ մտած նոր կարգավորումների համաձայն՝ ՀՀ վարորդները, որոնք ՌԴ-ում գերազանցում են թույլատրելի մնալու ժամկետը, չեն կարողանա նորից մուտք գործել երկիր։

Եվրոպական երկրներն ավելացրել են ռուսական էներգետիկ ռեսուրսների ներմուծումը
Ֆրանսիան, Բելգիան և Նիդերլանդները զգալիորեն մեծացրել են ռուսական հումքի գնումները։ Ընդհանուր ներմուծումը ԵՄ-ում կազմել է ավելի քան 11 մլրդ եվրո՝ տարվա ութ ամիսների ընթացքում։

Հետաքրքիր

Amazon-ը մինչև 2027թ․ 1 միլիարդ եվրո կներդնի Բելգիայում
Ընկերությունը ծրագրում է ընդլայնել իր լոգիստիկ ենթակառուցվածքը և զարգացնել համագործակցությունը տեղական փոքր բիզնեսների հետ՝ խթանելով տարածաշրջանի էլեկտրոնային առևտուրը։