2025-ի սեպտեմբերին տնտեսական աճը դանդաղել է․ արդյունաբերությունն ու արտահանումը նվազել են

Արդյունաբերության ընդհանուր ծավալը տարվա առաջին ինը ամիսներին կազմել է 2 տրիլիոն 55.9 միլիարդ դրամ։

2025 թվականի սեպտեմբերին Հայաստանում տնտեսական ակտիվությունը աճել է 10.5%-ով

ՀՀ վիճակագրական կոմիտեի նախնական տվյալներով՝ 2025 թվականի սեպտեմբերին տնտեսական ակտիվության ցուցանիշը (ՏԱՑ) 2024 թվականի սեպտեմբերի համեմատ աճել է 10.5%-ով։
Օգոստոսի համեմատ աճը կազմել է 9.8%, իսկ 2025 թվականի հունվար-սեպտեմբեր ամիսների կտրվածքով՝ տնտեսական ակտիվությունը գերազանցել է նախորդ տարվա նույն ժամանակահատվածի մակարդակը 7.6%-ով։

Արդյունաբերություն և շինարարություն

Սեպտեմբերին արդյունաբերական արտադրանքի ծավալը կազմել է 285.3 միլիարդ դրամ, ինչը 2024 թվականի սեպտեմբերի համեմատ աճել է 10.1%-ով։ Արդյունաբերության ընդհանուր ծավալը տարվա առաջին ինը ամիսներին կազմել է 2 տրիլիոն 55.9 միլիարդ դրամ, սակայն տարեկան կտրվածքով արձանագրվել է 5.7% անկում։

Շինարարության ոլորտում գրանցվել է շարունակական բարձր աճ։ Սեպտեմբերին շինարարական աշխատանքների ծավալը կազմել է 87.3 միլիարդ դրամ, ինչը 2024 թվականի սեպտեմբերի համեմատ աճել է 22%-ով։ Հունվար-սեպտեմբեր ամիսներին ընդհանուր ցուցանիշը հասել է 462.1 միլիարդ դրամի, որը 20.7%-ով ավելի է, քան նախորդ տարվա նույն ժամանակահատվածին։

Առևտուր և ծառայություններ

Սեպտեմբերին մանրածախ և մեծածախ առևտրի շրջանառությունը կազմել է 583.5 միլիարդ դրամ։ Ցուցանիշը նախորդ տարվա նույն ամսվա համեմատ աճել է 0.9%-ով, իսկ օգոստոսի համեմատ՝ նվազել 1.3%-ով։
Տարվա առաջին ինը ամիսների ընթացքում առևտրի շրջանառությունը կազմել է 4 տրիլիոն 724.1 միլիարդ դրամ, ինչը 3.5%-ով գերազանցում է նախորդ տարվա մակարդակը։

Ծառայությունների ոլորտում սեպտեմբերին գրանցվել է 7.9% աճ։ Ծառայությունների ծավալը կազմել է 352.9 միլիարդ դրամ, իսկ հունվար-սեպտեմբեր ամիսներին՝ 2 տրիլիոն 949.4 միլիարդ դրամ, տարեկան աճը՝ 9.9%։

Արտաքին առևտուր

Հայաստանի արտաքին առևտրաշրջանառությունը սեպտեմբերին կազմել է 1 միլիարդ 603 միլիոն ԱՄՆ դոլար,
ինչը նախորդ տարվա նույն ամսվա համեմատ 21.6%-ով պակաս է, սակայն օգոստոսի համեմատ աճել է 4.4%-ով։

Այդ ընթացքում արտահանումը կազմել է 658.9 միլիոն դոլար՝ տարեկան 24.4% անկմամբ, իսկ ներմուծումը՝ 944.2 միլիոն դոլար՝ 19.5% նվազումով։
2025 թվականի հունվար-սեպտեմբեր ամիսներին Հայաստանի արտաքին առևտրաշրջանառությունը կազմել է 14 միլիարդ 563.9 միլիոն դոլար, տարեկան կտրվածքով՝ 39.3% նվազում։

Գները և փոխարժեքը

Սեպտեմբերին սպառողական գների ինդեքսը կազմել է 103.7%, ինչը վկայում է 3.7% տարեկան գնաճի մասին։
Արդյունաբերական արտադրանքի գների ինդեքսը՝ 105.9%, ինչը նշանակում է, որ արդյունաբերական գներն աճել են շուրջ 6%-ով։

ՀՀ դրամի միջին փոխարժեքը ԱՄՆ դոլարի նկատմամբ սեպտեմբերին կազմել է 382.83 դրամ՝ ամրապնդվելով օգոստոսի համեմատ։

Էներգետիկա

Էլեկտրաէներգիայի արտադրությունը սեպտեմբերին կազմել է 764.5 միլիոն կՎտ/ժ, ինչը նախորդ տարվա նույն ամսվա համեմատ 13.2%-ով ավելի է։
Տարվա ինն ամիսների ընթացքում էլեկտրաէներգիայի արտադրությունը կազմել է 6 միլիարդ 716.4 միլիոն կՎտ/ժ՝ 4.6% տարեկան աճով։