Հայ զբոսաշրջիկների թիվը Վրաստանում աճել է․ 2025-ի հուլիս-սեպտեմբերին կատարվել է 329 հազար այց

Այցելությունների հիմնական նպատակներ եղել են հանգիստը և ժամանցը։

Վրաստանի Ազգային վիճակագրական ծառայության (Սաքստատ) զեկույցի համաձայն՝ 2025 թվականի հուլիս-սեպտեմբեր ամիսներին Վրաստան է այցելել 3 միլիոն ճանապարհորդ, ինչը 6.6%-ով ավելի է 2024 թվականի նույն ժամանակահատվածի համեմատ։

15 տարեկանից բարձր անձանց այցելությունների թիվը կազմել է 2.5 միլիոն, ինչը 6.8%-ով ավելի է 2024 թվականի երրորդ եռամսյակի համեմատ։

Վրաստան զբոսաշրջային այցելությունների թիվն աճել է 9%-ով՝ հասնելով 2 միլիոնի, իսկ այցելությունների հիմնական նպատակներ եղել են հանգիստը և ժամանցը։

Այս ժամանակահատվածում ամենաշատ զբոսաշրջիկներն են ընդունել Թբիլիսին և Աջարիան։ Ամենամեծ թվով այցելուներ են եղել Ռուսաստանից՝ 567,100, որը կազմում է այցելուների ընդհանուր թվի 26.1%-ը։ Հաջորդում են Թուրքիան՝ 16.5% մասնաբաժնով, և Հայաստանը՝ 11.8%-ով։

Ընդհանուր առմամբ, Ռուսաստանի քաղաքացիները կատարել են 664,600 այցելություն, Թուրքիայի քաղաքացիները՝ 430,000, իսկ Հայաստանի քաղաքացիները՝ 329,300։

Սաքստատի տվյալներով՝ 2025 թվականի երրորդ եռամսյակում օտարերկրացիները Վրաստանում ծախսել են 6.2 միլիարդ լարի, ինչը 8.6%-ով ավելի է 2024 թվականի հուլիս-սեպտեմբերի համեմատ։ Մեկ այցելության համար ծախսը աճել է 1.7%-ով՝ կազմելով 2,467.5 լարի։