Միրզոյան-Բլինքեն-Բայրամով հանդիպում. ի՞նչ են քննարկել կողմերը ՄԱԿ Գլխավոր ասամբլեայի 77-րդ նստաշրջանի շրջանակներում, ԱՄՆ պետքարտուղար Էնթոնի Բլինքենի միջնորդությամբ կայացել է Հայաստանի և Ադրբեջանի ԱԳ նախարարների հանդիպումը՝ առաջինը սեպտեմբերի 13-ին Ադրբեջանի կողմից Հայաստանի տարածքի նկատմամբ իրականացված ագրեսիայից հետո: Այս պահին հանդիպման արդյունքների հետ կապված տեղեկությունները քիչ են: Պետդեպի խոսնակը հայտնել է, որ կողմերը քննարկել են խաղաղության գործընթացին վերադառնալու հաջորդ քայլերը՝ առանց մանրամասնելու, թե ինչի մասին է խոսքը: Փրայսի խոսքով՝ պետքարտուղարը կոչ է արել կողմերին կրկին հանդիպել մինչև սեպտեմբերի վերջ: Հանդիպումը կարելի է դիտարկել Հայաստանի և Ադրբեջանի միջև հարաբերությունների կարգավորման ամերիկյան ինտեսիվացած ջանքերի շրջանակներում՝ որպես սեպտեմբերի 14-ին հրադադարի ամերկյան միջնորդության և ԱՄՆ ներկայացուցիչների պալատի խոսնակ Նենսի Փելոսի՝ Հայաստան այցի տրամաբանական շարունակություն: Ինչ արդյուքներ կունենա այս միջնորդությունը դեռ վաղ է խոսել. հայկական կողմը շարունակում է հայտարարել առկա տեղեկությունների մասին առ այն, որ Ադրբեջանը նոր հարձակում է նախապատրաստում: