Տերմինալով վճարումը համարվում է անկանխիկ գործարք Կենտրոնական բանկը պարզաբանել է, արդյոք տերմինալով վճարումը համարվում է անկանխիկ գործարք, թե ոչ: Երկրի գլխավոր դրամատունը հայտնում է, որ անկանխիկ է համարվում նաև կանխիկ եղանակով նախաձեռնած վճարումը, որն ուղղված է տնտեսվարողի բանկային հաշվին: Այսպիսով, տնտեսվարողի բանկային հաշվեհամարին վճարային տերմինալով փոխանցումը համարվում է անկանխիկ գործարք, քանի դեռ օրենսդրությամբ կամ այլ իրավական ակտերով այլ կարգավորումներ չեն նախատեսվել: Կենտրոնական բանկը հայտնում է նաև, որ կանխիկի պահպանման ու թարմացման համար իրականացվում են զգալի ծախսեր :  Այս առումով ևս ենթադրվում է, որ կանխիկի օգտագործման ծախսերի նվազմանը զուգընթաց պայմաններ են ստեղծվում նաև անկանխիկ գործառնությունների միջնորդավճարի նվազման ուղղությամբ: Կենտրոնական բանկը պարբերաբար մոնիտորինգի է ենթարկելու շուկայական գները՝ դրանց մակարդակի հիմնավորվածությունը գնահատելու նպատակով: