Մայիսի 16-ը Հայաստանում նշվում է որպես ուսանողների և երիտասարդների օր։ Շուտով հայաստանյան բուհերի շարքերը կհամալրեն ապագա ուսանողները, որոնց մասնագիտական կողմնորոշման հարցում աջակցել են ոչ միայն ընտանիքն ու դպրոցը, այլև ֆինանսական և հասարակական կազմակերպությունները։
ԱրարատԲանկի երկարաժամկետ աջակցությունը երիտասարդներին
ԱրարատԲանկը 2021 թվականից սերտորեն համագործակցում է «Ուսանողի տան» հետ՝ առաջնորդվելով մարզերի զարգացման և սոցիալական ծրագրերի ապակենտրոնացման սկզբունքներով։ Համագործակցությունը մեկնարկել է «Ուսանողի տան» գրադարանի վերանորոգմամբ և գրապահոցի համալրմամբ, շարունակվել մասնագիտական կողմնորոշման ճամբարի ֆինանսավորմամբ։ Արդեն երկրորդ տարին ԱրարատԲանկը ֆինանսավորում է «Հորիզոն» ճամբարը, իսկ բանկի մասնագետները տարիների ընթացքում պարբերաբար մասնագիտական գիտելիքներով են կիսվել «Ուսանողի տան» սաների հետ տարբեր հանդիպումների շրջանակում։
«ԱրարատԲանկի առաքելությունն է աջակցել այն նախաձեռնություններին, որոնք իրական փոփոխություններ են բերում հասարակության մեջ։ «Ուսանողի տան» հետ մեր համագործակցությունը տարիների ընթացքում ցույց է տվել, որ երիտասարդների ներուժի բացահայտումը և նրանց առաջնորդական հմտությունների զարգացումը կարող են բեկումնային լինել ինչպես նրանց անհատական կարիերայի, այնպես էլ մեր հասարակության համար ընդհանուր առմամբ»,- նշել է Աննա Ալլահվերդյանը՝ ԱրարատԲանկի Հաղորդակցության և սոցիալական պատասխանատվության ծրագրերի համակարգման բաժնի ղեկավարը։
Ինչպե՞ս ապագա ուսանողից կերտել ապագա առաջնորդի
Շուտով ԱրարատԲանկի աջակցությամբ «Հզոր միտք» հասարակական կազմակերպության «Հորիզոն» առաջնորդական հմտությունների զարգացման ճամբարն իր դռները կբացի ավելի քան 80 մարզաբնակ և Արցախից տեղահանված երիտասարդների համար։
Անմոռանալի երեկոներ, խարույկի շուրջ քննարկումներ, հետաքրքիր խաղեր, բայց ոչ միայն։ «Հորիզոնը» կրթական ճամբար է, եթե խաղ՝ ապա քննադատական մտածողությունը զարգացնելու համար, եթե խնդիր՝ ապա այն խորությամբ բացահայտելու համար։
«Հորիզոն» ճամբարը հնարավորություն է տալիս զարգացնել առաջնորդական, քննադատական մտածողության և կապերի ձևավորման հմտություններ՝ միևնույն ժամանակ ձևավորելով սոցիալական պատասխանատվություն սեփական համայնքի և հայրենիքի նկատմամբ։
«Գաղափարը ծնվել է մարզային այցերի և միջմարզային միջոցառումների ընթացքում: Երիտասարդների հետ աշխատելիս նկատել ենք, որ նրանք, չունենալով բավարար կապեր և գյուղական միջավայրից դուրս գալու հնարավորություն, հաճախ ընտրում են մասնագիտություններ՝ ծանոթ չլինելով բազմաթիվ այլ ոլորտների, հատկապես STEM ուղղության հնարավորություններին:
Այս խնդիրը լուծելու նպատակով, ԱրարատԲանկի աջակցությամբ, 2021 թվականից իրականացնում ենք տարբեր ծրագրեր՝ մասնագիտական կողմնորոշման և առաջնորդական ճամբարներ: Այս միջավայրում երեխաները հնարավորություն են ստանում ծանոթանալու միմյանց, ինչպես նաև տարբեր մասնագետների, գործարարների և գիտնականների հետ: Արդյունքում, նրանք հետագայում ավելի գիտակցված և վստահ են մասնագիտություն ընտրում: «Հորիզոն» ճամբարները յոթօրյա ինտենսիվ ծրագրեր են, որոնց ընթացքում զարգացնում ենք երեխաների առաջնորդական հմտությունները և նպաստում հայրենաճանաչությանը», — նշել է «Հզոր Միտք» ՀԿ նախագահ Մհեր Մկրտչյանը։
ԱրարատԲանկի ներդրումը երիտասարդների կրթական ու նորարարական ապագայի կառուցման գործում շարունակական է։ Այս անգամ ևս, յոթ օրվա ընթացքում երիտասարդները հնարավորություն կունենան մասնակցել սեմինարների, որոնց խոսնակները տարբեր ոլորտների լավագույն առաջնորդներն են։ Երիտասարդները կբացահայտեն ապագայի մասնագիտությունները՝ ստեղծելով նոր կապեր, մասնակցելով թիմային քննարկումների և գեներացնելով նոր գաղափարներ։
ԱրարատԲանկը վերահսկվում է ՀՀ ԿԲ կողմից
