2025 թվականի մարտին Հայաստանում իրականացվել է 4,258 անշարժ գույքի առքուվաճառքի գործարք։
Վիճակագրական կոմիտեի հրապարակած տվյալների համաձայն՝ շուկան շարունակում է կենտրոնացած մնալ մի քանի հիմնական վայրերում, որտեղ պահանջարկն ամենաբարձրն է։
Ամենաշատ գործարքները՝ 1,470, կատարվել են Երևանում, ինչը կազմում է ընդհանուր գործարքների 34․5 տոկոսը։ Մայրաքաղաքը պահպանել է իր դիրքը որպես անշարժ գույքի շուկայի հիմնական կենտրոն՝ շնորհիվ իր ժողովրդագրական, տնտեսական և ներդրումային գրավչության։
Երկրորդ հորիզոնականում է Կոտայքի մարզը՝ 714 գործարքով կամ 16․8 տոկոս բաժնեմասով։ Մարզը շահում է իր մերձքաղաքային դիրքից՝ առաջարկելով ավելի մատչելի գներ, բայց նաև՝ մոտիկություն մայրաքաղաքին։
Հաջորդում են Արմավիրն ու Արարատը՝ գրեթե հավասար ակտիվությամբ։ Արմավիրում գրանցվել է 441 գործարք (10․4%), իսկ Արարատում՝ 440 գործարք (10․3%)։ Այս մարզերում անշարժ գույքի շարժը նույնպես վկայում է որոշակի պահանջարկի առկայության մասին, հատկապես գյուղատնտեսական և մերձքաղաքային գոտիներում։
Արագածոտնում իրականացվել է 259 գործարք (6․1%), Լոռիում՝ 238 գործարք (5․5%), իսկ Տավուշում՝ 212 գործարք (5.0%)։ Այս տվյալները ցույց են տալիս, որ նույնիսկ մարզերի պարագայում առքուվաճառքի շուկան որոշ չափով ակտիվ է։
Գեղարքունիքում, Սյունիքում և Շիրակում գործարքների թիվը տատանվել է 130-150 միջակայքում՝ համապատասխանաբար կազմելով շուկայի 3-3․5 տոկոսը։ Վայոց Ձորում գրանցվել է 63 գործարք՝ ընդամենը 1.5 տոկոս բաժնեմասով, ինչը վկայում է շուկայի համեմատաբար պասիվության մասին։
***
Ընդհանուր առմամբ՝ Երևանն ու նրան մոտ գտնվող մարզերը միասին ապահովել են գործարքների ավելի քան կեսը։ Սա խոսում է կենտրոնացված պահանջարկի և զարգացման հիմնական ուղղությունների մասին։ Մյուս մարզերում առկա ավելի ցածր ակտիվությունը կարող է ներկայացնել հնարավորություններ՝ ավելի մատչելի գներով ներդրումային ծրագրերի համար, հատկապես՝ ենթակառուցվածքների զարգացման դեպքում։
